16 студзеня 1948 г.

Як звычайна на 4-м курсе аддзялення журналістыкі сабраліся на заняткі студэнты. Як звычайна на першую лекцыю на 10 хвілін спазнілася студэнтка Іда Фрайман. I калі празвінеў званок на перапынак (глыбока радасна ўздыхнуў студэнт Мікалай Уладзіміраў), ля стала з ’явілася групкамсорг Ларыса Фадзеева.

— Таварышы камсамольцы! Сёння пасля заняткаў адбудзецца групавы камсамольскі сход! — звонкім голасам паведаміла яна. Даём крыху скарочаную стэнаграму гэтага схода (са стэнаграмы выключаны жарты, смех, спрэчкі, якія не адносяцца да справы).
Фадзеева. Ёсць думка абмеркаваць пытанне аб зрыве камсамольскага схода па прычыне няяўкі камсамольцаў. Справа ў тым, што на сход з 19 камсамольцаў з’явілася толькі 8. Без уважлівых прычын адсутнічалі таварышы: Процька, Бондарава, Ярашэўская, Кармалітава і іншыя. Пачнём абмеркаванне. Чаму не з ’явіўся тав. Процька?

Процька. Вялікі сакрэт.

Бягун. Я ведаю. Ен увесь дзень сек і піліў дровы.

Процька. Ну, што ты, хлопча, у мяне балеў жывот.

Бягун. Так, так. Я бачыў у яго кішэні многа парашкоў.

(Агульны смех.)

Шыцік. Прызнаць прычыну ўважлівай!

Фадзеева. Ёсць прапанова прызнаць прычыну ўважлівай.

Галасую!

(Пад агульны смех прымаецца пастанова Шыціка.)

Амаль з такімі ж матывамі апраўдання сваёй адсутнасці на сходзе выступілі: Бондарава, Кармалітава, Ярашэўская і іншыя. Адна толькі Сцяпанава чэсна прызналася, што не была на сходзе без уважлівых прычын.

Сход прымае рашэнне:

Лічыць, што 10 камсамольцаў не з ’явіліся на сход, бо былі хворыя. Камсамолку Сцяпанаву за адсутнасцю на сходзе без уважлівых прычын папярэдзіць.
(Пад агульны смех, жарты Фадзеева зачыняе сход.)

Цяжка верыць, што на 4-м курсе аддзялення журналістыкі можа так праводзіцца камсамольскі сход. Але, на жаль, гэта горкая праўда.

Мы друкуем гэты матэрыял не для таго, каб паказаць, што на 4-м курсе аддзялення журналістыкі некалькі чалавек з камсамольскімі білетамі ў кішэні, а не ў сэрцы свядома пераўтварылі камсамольскі сход у жарт, для таго каб паказаць, што дрэнна працуе групкамсорг.

Фадзеева.

Справа больш важная.

Шматлікія факты сведчаць аб тым, што ў многіх камсамольскіх групах сходы праводзяцца ў гэткім жа стылі.

Групавыя камсамольскія сходы не з ’яўляюцца школай выхавання моладзі таму, што адсутнічае належная падрыхтоўка да іх, адсутнічаюць планы работы камсамольскіх груп. Бюро камсамольскіх арганізацый факультэтаў не кіруюць работай камсамольскіх груп, не праводзяць работу групкамсоргаў.
Па сутнасці, гэта азначае, што ўся асноўная частка камсамольскай работы — работа камсамольскіх груп — адсутнічае.

Камітэт камсамола універсітэта (нам. сакратара тав. Бабушкін) зусім не ўдзяляе ўвагі гэтаму пытанню, відаць, што такімі «дробязямі» займацца яму не да твару. Даўно трэба зразумець, што камсамольская работа заключаецца не толькі ў «міжнародных» мерапрыемствах, якія з вялікім шумам праводзяць камсамольскія кіраўнікі на чале з тав. Бабушкіным.

Галоўную ўвагу — рабоце камсамольскіх груп!

А. Філімонаў